DESIGN & BRANDING

Bu kateqoriya bir çox brend təmas nöqtələri (loqo, brend təminat, brend üçün identifikasiya sistemi - vizit kartları, dəftərxana ləvazimatları, loqo, şəbəkə identifikatorları, brendinq qaydaları və s.) üzrə hazırlanmış brend kimlik həlləri üçündür. O cümlədən yeni brend kimliyinin yaradılması, mövcud brendin rebrendinqi və yenilənməsi də buraya daxildir.

Xüsusi marketinq kampaniyası və ya limitli məhsul xətti, qrupu üçün brendinq. Buraya kampaniya dizaynları və onların elementləri də daxildir.

Brendin və ya kampaniyanın kommunikasiyasını dəstəkləmək məqsədilə hazırlanmış promo məhsulları və materialları dəyərləndiriləcək. Geyim məhsulları, "merchandise", promo hədiyyələri və nümunələri, xüsusi hazırlanmış korporativ hədiyyələr, dəvətnamələr, açıqcalar, təqvimlər, biletlər və buna bənzər çap və ya fiziki brend materialları bu kateqoriyaya daxildir.

Brend hekayəsinin və ya mesajının fiziki təcrübəyə çevrildiyi tədbir, sərgi, kampaniya təqdimatı, brend məkanı, pərakəndə satış mühiti və buna bənzər layihələrdəki dizayn işləri dəyərləndiriləcək. Təcrübə məkanının vizual kimliyinin yaradılması, eləcə də dizaynın planlaşdırılan təcrübəyə və istifadəçi ilə qarşılıqlı əlaqəyə verdiyi töhfə qiymətləndirmədə əsas rol oynayacaq. İstiqamətləndirmə dizaynları, məkandaxili qrafik həllər, instalyasiyalar və təcrübə məkanının digər vizual kimlik elementləri bu kateqoriyaya daxildir.

Məhsul və xidmətlər üçün bütün bağlamalar, qablar, örtüklər və etiketlər buraya daxildir.

Reklam və brend kommunikasiyasından istifadə üçün poster dizaynı. Element başqa media üçün nəzərdə tutulmuş və poster formatına tətbiq edilən konsepsiya deyil, poster kimi yaradılmış olmalıdır. Bunlar həm çap, həm də rəqəmsal ola bilər.

Çap kitabları, jurnallar, qəzetlər, broşürlər, məqalələr, illik hesabatlar, kataloqlar və s. üçün redaksiya və üz qabığının dizaynı, həmçinin e-kitablar, rəqəmsal jurnallar və kataloqlar üçün rəqəmsal nəşrlər üzrə dizayn buraya daxildir.

Rəqəmsal məhsulların funksional və rahat istifadəsini təmin etmək məqsədilə hazırlanmış interfeys dizaynları istifadəçi təcrübəsinə verdiyi töhfə əsasında dəyərləndiriləcək. Veb-saytlar, mobil tətbiqlər və digər rəqəmsal məhsul və platformalar üçün hazırlanmış UI/UX dizaynları bu kateqoriyaya daxildir.

Qrafika, tipoqrafiya, illüstrasiya, rəng, kompozisiya və səsin zaman və hərəkət əsasında tərtib edildiyi layihələr dəyərləndiriləcək. Statik dizayn elementlərinin hərəkət, keçid, ritm və zamanlama ilə birləşərək yaratdığı dinamik ifadə əsas götürüləcək. Açılış titrləri, kinetik tipoqrafiya, animasiyalı brend kimliyi həlləri, loqo animasiyaları, sosial media üçün hərəkətli dizaynlar, UI/UX mikroanimasiyaları və rəqəmsal ekran kontentləri bu kateqoriyaya daxildir.

Şriftlərdən estetik, funksional və kommunikativ məqsədlərlə istifadə edilən, tipoqrafiyanın dizaynın əsas elementini təşkil etdiyi layihələr dəyərləndiriləcək. Orijinal şrift dizaynları, eləcə də mövcud tipoqrafiyadan yaradıcı və fərqli istifadə nümunələri bu kateqoriyaya daxildir.

Brend, kampaniya, nəşr və ya digər kommunikasiya layihələri üçün hazırlanmış illüstrasiyalar dəyərləndiriləcək. Ənənəvi və ya rəqəmsal üsullarla hazırlanmış əl rəsmləri, 2D/3D işlər, süni intellekt vasitəsilə yaradılmış və ya hibrid üsullarla ərsəyə gətirilmiş illüstrasiyalar bu kateqoriyaya daxildir. İşin istifadə olunduğu kommunikasiya kanalı və brendlə əlaqəsi, özünəməxsus vizual dili və icra keyfiyyəti qiymətləndirmə zamanı nəzərə alınacaq.